Cúrsa Gaeilge 3 (Meánleibhéal)
Díríonn an cúrsa seo ar líofacht cainte sa saol laethúil.
Féilire cúrsaí ar líne
Is iomaí foghlaimeoir Gaeilge, i ndiaidh tamaill áirithe, a bhíonn ábalta tuiscint cheart a bhaint as caint sa saol laethúil ach ar deacair dóibh iad féin a chur in iúl i gceart nó ceisteanna áirithe a fhreagairt gan dua! Is í taithí fhoireann Oideas Gael go mbaineann foghlaimeoirí atá ag an staid seo tairbhe mhór as cleachtadh comhrá i ngrúpaí beaga agus an cleachtadh sin dírithe ar thopaicí faoi leith le treoir ó mhúinteoir oilte.
Sa chúrsa seo déanfaidh tú plé ar réimse ilghnéitheach ábhar a bhaineann le gnáthchúrsaí an tsaoil. Cuirfear béim ar do stór focal a leathnú agus ar do chumas chun cumarsáid a dhéanamh a neartú. Bainfidh na rannpháirtithe buntáiste as curaclam saincheaptha, agus ábhar foghlama a chuirfear ar fáil dóibh, a bheidh do mhúinteoir in ann a chur in oiriúint do riachtanais an ghrúpa. Beidh neart craic agus deiseanna labhartha ann fosta!
Amchlár
Freastalóidh rannpháirtithe an chúrsa seo ar cheann amháin nó ar an dá dhianchúrsa lae a bheidh ar siúl ar an Satharn, 7 Feabhra agus ar an Satharn 21 Feabhra 2026. Pléifear gnéithe éagsúla den teanga ar an dá lá agus is féidir freastal ar an dara lá fiú muna raibh tú i láthair ag an chéad chúrsa. Baineann na hamantaí ranga agus aon amantaí eile a luaitear ar an suíomh seo leis an am áitiúil in Éirinn (GMT)—tabhair aird air seo, le do thoil, má bhíonn tú ag féachaint ar an fhéilire cúrsaí agus tú i do chónaí thar lear.
